Saudiya Arabistoni O‘zbekiston bilan turizm sohasida hamkorlik qilishga tayyorligini bildirdi

Saudiya Arabistonining sayyohlik kompaniyasi O‘zbekiston bilan turizm sohasida hamkorlikni faol rivojlantirish va Saudiyadan sayyohlarning mamlakatga kelishini ko‘paytirish niyatida, deb xabar bermoqda “Dunyo” axborot agentligi.

Ar-Riyodda O‘zbekiston elchisi Nodir Turg‘unov va Saudiya Arabistoni xalqaro sayyohlik kompaniyasi vakili Abdulaziz Sulaymon o‘rtasidagi uchrashuvda mazkur hamkorlik istiqbollari va boshqa mumkin bo‘lgan yo‘nalishlar muhokama qilindi.

Tomonlar mamlakatlarimiz o‘rtasidagi hamkorlik muvaffaqiyatli rivojlanib borayotgani, barcha darajadagi o‘zaro tashriflar soni ortib borayotgani, qo‘shma tadbirlar o‘tkazilayotganini ta’kidladi.

Saudiya kompaniyasi menejeri O‘zbekistonda turizm sohasidagi islohotlarni diqqat bilan kuzatib borayotgani va bu yo‘nalishdagi hamkorlikni mustahkamlashdan manfaatdor ekanini ta’kidladi.

Bundan tashqari, uchrashuvda ta’lim va qishloq xo‘jaligi sohalarida hamkorlikni yanada rivojlantirish imkoniyatlari muhokama qilindi. Uchrashuv yakunlari boʻyicha muzokaralar oʻtkazish va ikki davlat manfaatdor idoralari va sayyohlik kompaniyalari oʻrtasida hamkorlik istiqbollarini muhokama qilish boʻyicha kelishuvga erishildi.